ماهوب كف الوقت حبك يمحيه
يلي تخاف صروف الوقت تمحاه
ارتاح دام إن الموصل يقويه
انت انت وانا انا وقلبي هو وياه
حتى لو بتغيب ذكراك تكفيه
ياواحد تكفي عن الناس ذكراه
حبك على رملة خفوقي مواطيه
ورياح عذلي عنك ماتمسح خطاه
واللي يعذل القلب عن درب غاليه
الله بما يبلا المواليف يبلاه
اخفيه يا بلفيت والحال يبديه
ادناة واحد ينظر الحال يقراه
مخفيه فيه ومعتنبه وحاميه
عن كل عين ودها تنزل حماه
قلب يحبك والهوا الذرب ماليه
كانك مكذبني بعينك تحلاه
شرط تشوفك فيه ماانت بحواليه
ويمكن تشوف ديار وأماكن رعاه
وتشوف به تمثال والوقت هاريه
وبتشوف زرع ميت و واقف ماه
وبتشوف جرح فيه سكين راعيه
راح ونسى السكين والجرح ينخاه
وبتشوف حصن عج الاقدار سافيه
وبتشوف باقي بيت راعيه خلاه
لا تنزعج هذا خفوقي وباقيه
ولا تضايق من تصدع زواياه
قد زلزله فرقا وهزت عراويه
والله ستر والحظ عانه وعافاه
وكانه صلحلك واعجبك زيد تبنيه
ابنه وجهز للمقابيل مبناه
ابغيك بس من المفارق اداريه
وازهل من يداري شعورك ويدراه
وحلل وحرم فيه يا ابرك بلاويه
وحله وراع رضاي ورضاك ورضاه
جعلك بعد بعض الوجيه أمحق وجيه
ناس مراتعها رفيق بتقفاه
أنواع وأخطر نوع ماني بناسيه
نوع على تفريق الاثنين مسعاه
تلقاه دوم وكل يوم تلاقيه
ولا بغيت الصدق ماعد تلقاه
ولا أنت ردك كل مدعيك لبيه
انا اشهد منتو(ب) في عيني اشباه
منت (ب) مع العالم ولا تقولي ليه
انت ادرى مني وش جوابي وفحواه
كذيه من الله يازين واليه
واغلى طروش القلب ودواه من داه
الحلم ياتيني بزولك وراعيه
وفي كل حلم أقوم قبل اتحفاه
اعشق سميك في البزارين وادعيه
واقبل خطاه الا اخطأ واتلقاه
اسمك يروعني الا مر طاريه
واحب ملقوف يسولف وطراه
وأمر بيتك من بعيد ولا جيه
وانا لو انه في يدي ماتعداه
حتى تواير موتري تلتفت فيه
تبغي تلف ويستحي العقل والجاه
وصلك يخيط الصدر والبعد يفريه
وبري حالي كان صديت برياه
ويلي على ادري عن حبنا ويش تاليه
ويلي على ادري وش ورا الغيب ويلاه
عشان اشوف اذا محبتك ترفيه
والله لقفي عنك استغفر الله :)
الأربعاء فبراير 01, 2017 4:28 pm من طرف 
